У першую суботу Вялікага посту копіі найбольш шанаваных цудадзейных абразоў Маці Божай сустрэлі ў Клецкім касцёле святой Тройцы
Парафіяльная супольнасць у Клецку стала 5-й каталіцкай парафіяй Нясвіжскага дэканату, куды святая Марыя адправілася, каб адведаць сваіх дзяцей.
Раней Багародзіца завітала ў Нясвіж, Капыль, Старыя Дарогі, і са Слуцка 25 лютага прыбыла ў парафію Святой Тройцы ў Клецк.
Як гэта традыцыйна адбываецца падчас перэгрынацыі, каля святыні нябесную Матулю ў копіях Яе цудадзейных вобразаў прывіталі вернікі начале са сваім пробашчам ксяндзом Паўлам Слукой MSF. Праслаўляючы Яе спевамі – пілігрымуючыя абразы вернікі працэсіяй унеслі ў касцёл.
Як зазначыў а. Павел на пачатку святой Імшы “Багародзіца займае асаблівае месца ў гісторыі збаўлення, а таксама ў гісторыі нашай краіны. Бо ўсе копіі гэтых цудоўныых ікон – гэта вобразы адной Маці шанаваных ў розных месцах нашага краю”.
Звярнуўся са словам і духоўны айцец перэгрынацыі Станіслаў Станеўскі CSsR. У сваёй гаміліі, разважаючы над гісторыяй культу Маці Божай на нашай зямлі а. Станіслаў заўважыў, што амаль чатыры стагоддзі нашыя дзяды і прадзеды прыходзілі, каб ушанаваць Маці Божага Сына. А шматлікія цуды, якія былі здзейснены дзякуючы моцнай веры нашых продкаў і Божай ласцы – сведчаць аб тым, што Марыя заўсёды слухае кожнага. “Марыя прынесла нам самы вялікі цуд – Езуса Хрыста! Яна заахвочвае нас не толькі прыняць Яго, але і, слухаючы словы Хрыста – будаваць сваё жыццё згодна з воляй Божай”.
Абразы прабудуць ў Клецку па 11 сакавіка. Штодня падчас набажэнстваў, як было і ў папярэдніх парафіях, у перыяд прабывання абразоў адбудзецца асаблівая малітва праз заступніцтва Найсвяцейшай Панны Марыі. Душпастыр Павел Слука заахвочвае кожнага хрысціяніна, незалежна ад веравызнання, скарыстаць гэты час, каб аднавіць сваё асабістае спатканне з Багародзіцай.
Фота: Віктар Ведзень
Меткі: Фота - Віктар Ведзень, Маці Божая, кс. Уладзіслаў Завальнюк