10 жніўня — свята св. Лаўрэнція, дыякана і мучаніка
ПЕРШАЕ ЧЫТАННЕ 2 Кар 9, 6–10
Бог любіць таго, хто дае з радасцю
Чытанне Другога паслання святога апостала Паўла да Карынцянаў.
Браты:
Хто сее скупа, той скупа і пажне, а хто сее шчодра, той шчодра і пажне. Няхай кожны дае, як вырашыць у сэрцы сваім, а не са шкадаваннем ці з прымусу, таму што Бог любіць таго, хто дае з радасцю. Бог мае моц узбагаціць вас усякаю ласкаю, каб вы, заўсёды і ва ўсім маючы ўсялякі дастатак, былі багатыя на ўсялякія добрыя справы. Як напісана: Раскідаў, раздаў бедным; справядлівасць ягоная трывае навекі. А той, хто дае сейбіту насенне і хлеб на спажытак, дасць і памножыць вашае насенне, і ўзрасціць плён справядлівасці вашай.
Гэта слова Божае.
РЭСПАНСАРЫЙНЫ ПСАЛЬМ Пс 112 (111), 1–2. 5–6. 7–8. 9 (Р.: 5а)
Рэфрэн: Шчаслівы той, хто міласэрны і пазычае.
1. Шчаслівы чалавек, які баіцца Пана *
і вельмі любіць Ягоныя запаведзі.
2. Моцным будзе ягонае патомства на зямлі, *
пакаленне праведных будзе благаслаўлёным.
Рэфрэн:
5. Шчаслівы чалавек, які міласэрны і пазычае, *
які справядліва вядзе свае справы.
6. Ён не пахіснецца ніколі, *
у вечнай памяці будзе справядлівы.
Рэфрэн:
7. Ён не пабаіцца дрэннай навіны, *
моцнае сэрца яго, што спадзяецца на Пана.
8. Умацаванае сэрца яго не будзе баяцца, *
калі гляне на ворагаў сваіх.
Рэфрэн:
9. Раскідаў, раздаў бедным; *
справядлівасць ягоная трывае навекі,
моц ягоная *
ўзвысіцца ў славе.
Рэфрэн:
СПЕЎ ПЕРАД ЕВАНГЕЛЛЕМ Ян 8, 12bc
Акламацыя: Аллелюя, аллелюя, аллелюя.
Хто ідзе за Мною, той не будзе хадзіць у цемры,
але будзе мець святло жыцця.
Акламацыя: Аллелюя, аллелюя, аллелюя.
ЕВАНГЕЛЛЕ Ян 12, 24–26
Хто Мне служыць, таго ўшануе Айцец Мой
+ Чытанне святога Евангелля паводле Яна.
У той час:
Езус сказаў сваім вучням: Сапраўды, сапраўды кажу вам: калі пшанічнае зерне, упаўшы ў зямлю, не памрэ, то застанецца адно, а калі памрэ, то прынясе багаты плён. Хто любіць жыццё сваё, загубіць яго; а той, хто ненавідзіць жыццё сваё на гэтым свеце, захавае яго для вечнага жыцця. Калі хто служыць Мне, няхай ідзе Маім шляхам; і дзе Я, там будзе і слуга Мой. І хто Мне служыць, таго ўшануе Айцец Мой.
Гэта слова Пана
Паводле catholic.by
Меткі: Чацвер, Слова Божае, Лекцыянарый, Разважанні