Чацвер IV звычайнага тыдня, год І
ПЕРШАЕ ЧЫТАННЕ Гбр 12, 18-19. 21-24
Вы прыступіліся да гары Сіён і да горада Бога жывога
Чытанне Паслання да Габрэяў.
Браты:
Вы не прыступіліся ні да таго, да чаго можна дакрануцца, ні да распаленага агню, ні да змроку, цемры і буры, ні да гуку трубы і голасу словаў, пачуўшы які, слухачы прасілі, каб ён больш не прамаўляў. А відовішча было настолькі страшнае, што Майсей сказаў: Я спалоханы і дрыжу.
Вы ж прыступіліся да гары Сіён і да горада Бога жывога, да нябеснага Ерузалема, да безлічы анёлаў, да святочнага сходу, да Касцёла першародных, запісаных у нябёсах, і да Бога – Суддзі ўсіх, да духаў праведных, якія дасягнулі дасканаласці, да Езуса – Пасрэдніка Новага Запавету, да акраплення крывёю, якая прамаўляе больш, чым кроў Абэля.
Гэта слова Божае.
РЭСПАНСАРЫЙНЫ ПСАЛЬМ Пс 48 (47), 2-3а. 3b-4. 9. 10-11 (Р.: пар. 10)
Рэфрэн: Пра ласку Тваю, мы разважаем, Пане.
2. Вялікі Пан і годны вялікай хвалы *
у горадзе нашага Бога.
3. Яго святая гара – цудоўнае ўзвышша, *
радасць усёй зямлі.
Рэфрэн:
Гара Сіён, мяжа поўначы, – *
горад вялікага Караля.
4. Бог у ягоных палацах *
стаў вядомы як абаронца.
Рэфрэн:
9. Як мы чулі, так і ўбачылі, *
у горадзе Пана Магуццяў,
у горадзе нашага Бога; *
Бог умацуе яго навекі.
Рэфрэн:
10. Разважаем, Божа, пра Тваю міласэрнасць, *
пасярод святыні Тваёй.
11. Як імя Тваё, Божа, так і хвала Твая †
аж да межаў зямлі. *
Правіца Твая напоўнена справядлівасцю.
Рэфрэн:
СПЕЎ ПЕРАД ЕВАНГЕЛЛЕМ Мк 1, 15
Акламацыя: Аллелюя, аллелюя, аллелюя.
Наблізілася Валадарства Божае:
кайцеся і верце ў Евангелле.
Акламацыя: Аллелюя, аллелюя, аллелюя.
ЕВАНГЕЛЛЕ Мк 6, 7-13
Пачаў высылаць іх па двое
+ Чытанне святога Евангелля паводле Марка.
У той час:
Езус паклікаў Дванаццаць і пачаў высылаць іх па двое, і даў ім уладу над нячыстымі духамі. І наказаў ім не браць у дарогу нічога, апрача толькі кія: ні хлеба, ні торбы, ні медзі ў поясе, але абувацца ў сандалі і не апранаць дзвюх вопратак.
І сказаў ім: Калі дзе ўвойдзеце ў дом, заставайцеся там, пакуль не выйдзеце адтуль. І калі ў якім месцы не прымуць вас і не будуць слухаць вас, то, выходзячы адтуль, абтрасіце пыл, што пад нагамі вашымі, дзеля сведчання супраць іх.
І, пайшоўшы, яны прапаведавалі пакаянне; і выганялі шмат дэманаў, і шмат хворых намашчвалі алеем, і вылечвалі.
Гэта слова Пана.
Паводле catholic.by
Меткі: Чацвер, Слова Божае, Лекцыянарый, Разважанні